ភ្នំពេញ៖ បើតាមប្រភពដែលទទួលបានថ្មីៗនេះ អ្នកគ្រូ ឱម យុវណ្ណា ដែលជាគ្រូបង្រៀនផ្នែករបាំបុរាណ នៃសាលាមធ្យមវិចិត្រសិល្បៈ បានទទួលមរណភាពហើយកាលពីវេលាម៉ោង ៣ទាបភ្លឺ ឈានចូលថ្ងៃចន្ទ ទី ១៧ ខែឧសភានេះ ដោយរោគាពាធ (ជំងឺមហារីក)។
យោងតាមម្ចាស់គណនីហ្វេសប៊ុក Hatha ហត្ថា បានសរសេរថា៖ “សូមចូលរួមរំលែកទុក្ខដ៏ក្រៀមក្រំបំផុត ចំពោះការបាត់បង់អ្នកគ្រូ ឱម យុវណ្ណា ដែលជាគ្រូបណ្ដុះបណ្ដាលរបាំក្បាច់បូរាណ...សូមវិញ្ញាណក្ខន្ធបានទៅកាន់ទីស្ងប់សុខ" ក្នុងនោះក៏គេឃើញមានសិស្ស និងអ្នកធ្លាប់ស្គាល់អ្នកគ្រូផ្ទាល់ បានសម្តែងនូវសេចក្តីសោកស្តាយជាពន់ពេកចំពោះមរណភាពរបស់ធនធានផ្នែកសិល្បៈបុរាណដ៏មានតម្លៃរូបនេះ។
ឆ្លៀតឱកាសនេះ ក្រុមការងាររបស់គេហទំព័រ E-Arts សូមចូលរួមរំលែកទុក្ខយ៉ាងក្រៀមក្រំចំពោះក្រុមគ្រួសារសពអ្នកគ្រូ ឱម យុវណ្ណា និងសូមបួងសួងឱ្យវិញ្ញាណក្ខ័ន្ធអ្នកគ្រូបានដល់សុគតិភព កុំបីអាក់ខានឡើយ៕
